徐子珊被林峯笑失蹤人口 網民法國偶遇曝光近況
出版日期: Wednesday, June 04, 2025
文本大小:
徐子珊自2019年毅然宣布退出娛樂圈，就近乎銷聲匿跡，老拍檔吳卓羲曾於去年自爆無法聯絡徐子珊。日前，因林峯演唱會又令網民憶起15年前曾為林峯擔任演唱會嘉賓嘅徐子珊，指佢嘅表演冇人可以超越；當傳媒問到徐子珊近況，林峯直言與徐子珊冇聯絡，並笑指佢係「失蹤人口」。
反而，曾與徐子珊一起到東非拍攝旅遊節目《活著》嘅宣萱透露二人一直有聯絡，不過就未有公開徐子珊更多近況，以保護好友私隱。
廣告.gif)
然而，有網民於早前喺法國巴黎橘園美術館偶遇徐子珊，留有一頭長捲髮嘅徐子珊著上連身裙及波鞋，打扮樸素低調。
徐子珊於2004年香港小姐競選勇奪冠軍，從而簽約TVB成為藝人，入行後隨即獲力捧，出演過《My盛Lady》、《美麗高解像》、《雷霆掃毒》等多部劇集，成為當家花旦之一，又曾進軍樂壇，實行歌影視三棲發展，跳唱歌《Hit me》至今仍令人印象深刻；另外，又投資7位數字創立自家珠寶品牌Kate Tsui。
不過，徐子珊於2019年讀完心理學碩士後便無預警宣布退出娛樂圈。自此，徐子珊幾乎完全消失於公眾視線，連社交媒體帳戶都一併註銷，過著極為低調嘅「神隱」生活，有傳徐子珊已移居歐洲，但又有指佢仍居住於香港。
